SHKRIMET

Testamenti Shpirtëror (i shkruar midis 1891 dhe 1899) është një dokument me rëndësi themelore për njohjen e pasurisë së botës së brendshme të Shën Leonardo Murialdos.

Ai tregon për krizën rinore, të përjetuar gjatë qëndrimit të tij në Kolegjin në Savona, dhe zbulimin progresiv të dashurisë së mëshirshme të një Hyji, i Cili kishte vazhduar ta donte, ndërsa ai, Leonardo, kishte vendosur ta braktiste.

Ai përshkruan udhëtimin e tij kthimi dhe besimi dhe tregon "historinë e tij të shpëtimit" të përbërë nga mëkati dhe falja, mosmirënjohja dhe riparimi, pendimi dhe dëshira për shenjtëri.

Është një shpallje besimi në Hyj "për madhështinë dhe pafundësinë" e mëshirës së tij; një këngë mirënjohjeje ndaj Hyjit për "mirësinë dhe bujarinë e tij"; një himn besimi dhe shprese te Hyji "aq i mirë, aq i durueshëm, aq bujar"; një lutje e qetë dhe e përzemërt që dëshiron të dëshmojë "të gjithë hidhërimin dhe sinqeritetin e pendimit të tij"; një britmë dashurie për Hyjin nga një zemër që dëshiron ta dojë Hyjin në një mënyrë "të pafund", por që ndihet e paaftë.

Është "historia e shpirtit të tij" në të cilën çdo i krishterë gjen diçka nga historia e vet prej mëkati, faljeje, e dashurie.

Letrat e Murialdos të gjetura dhe të publikuara deri më tani janë 2379.

Janë burime të çmuara për të mësuar mbi veprimtarinë e tij mes të rinjve të varfër dhe të braktisur të Torinos të shekullit të nëntëmbëdhjetë, kujdesin për djemtë e Kolegjit Zejtarë të Vegjël dhe për ata të veprave të tjera të tij, vuajtjet e përditshme për hallet (borxhet) ekonomike, por gjithashtu besimin e tij në Provaninë e Hyjit që nuk i braktis kurrë fëmijët e vet.

Letrat na lejojnë gjithashtu t'i afrohemi spiritualitetit të Murialdos në jetën e tij të përditshme, të dokumentojmë kontaktet e tij me disa personalitete italiane dhe të huaja (priftërinj, arsimtarë, laikë të përfshirë në Lëvizjen katolike, në shtyp ...) dhe janë plot me lajme interesante mbi Kongregatën nga ai e themeluar, mbi Veprat e saj dhe mbi vëllezërit e parë Jozefinë.

Ato janë dorëshkrimet autografe të të Shenjtit përtej letrave dhe Testamentit shpirtëror.

Ato janë botuar në 14 vëllime nga Qendra Historike Jozefinë të Murialdos. Këto janë konferenca, predikime, meditime, fjalime në kongrese katolike, fjalime të rastit, shënime të ndryshme ...

Është një material i domosdoshëm për njohjen e përshpirtërisë, pedagogjisë dhe veprimit mbeshtëtës dhe shoqëror të të Shenjtit.

Kongregata e Shën Jozefit ka mbledhur thesarin e çmuar të dorëshkrimeve të Shën Leonardos në botime të shtypura. Ato dëshmojnë për të gjithë ne që e ndjekim sot, aventurën e tij shpirtërore. Ato na ndihmojnë të kuptojmë se rruga drejt shenjtërisë është për njerëzit "normalë", siç është secili prej nesh.

PËR TË DITUR MË SHUMË

• Renzo Agasso, San Leonardo Murialdo amico, fratello, padre, Libreria Editrice Murialdo, Roma 2000.
• Giovenale Dotta, La figura e l’opera di San Leonardo Murialdo, in Giovenale Dotta – Giuseppe Fossati – Danilo Magni, Leonardo Murialdo, gli Artigianelli e l’Oratorio San Martino, Libreria Editrice Murialdo, Roma 2004, pp. 9-35.
• Eugenio Reffo, Vita del Teologo Leonardo Murialdo Rettore degli Artigianelli di Torino e Fondatore della Pia Società di S. Giuseppe, sesta ed., Tipografia S. Pio X, Roma 1964.